„Сладолед за жени” – премиера на „Артонаут“ и Театар Штип

Здружението „Артонаут“ во соработка со Театар Штип и Општина Штип, а во склоп на Штипско културно лето 2026, ја најавува премиерата на претставата „Сладолед за жени” во режија на Никола Ристов.

Претставата ја истражува тенката граница меѓу трагедијата и апсурдот. Една случајност, една погрешна одлука и група ликови кои очајно се обидуваат да ја сокријат вистината. Но вината има свој вкус и не исчезнува лесно.

„Сладолед за жени” не е класичен криминален трилер. Преку остар хумор, брзи дијалози и напната атмосфера, режисерот не’ тера да се смееме на ситуации кои всушност не се за смеа. Токму во тоа лежи силата на претставата да не’ соочи со нашите стравови и слабости, а потоа да не’ остави да размислиме.

Во претставата играат: Анѓелка Нашкова како Деби, Елена Шорова Дербов како Моли и Марија Минчева Андонов како Ники.

Премиерата ќе се одржи на 09.07.2026 г. (четврток) во 20 ч. на сцената на Театар Штип. Првата реприза е предвидена за 17.07.2026 г. „Сладолед за жени” е претстава за сите кои сакаат театар што боцка, насмевнува и не остава рамнодушност.