„Бижутерија“ на Јелена Розга, еден од најважните и најомилените хитови во нејзината соло кариера, доби свој музички спот.
Во годината кога слави 30 години од својата кариера, Јелена Розга ѝ носи на публиката посебно изненадување – песната што одбележа една ера и стана пресвртница во нејзиниот музички пат доби свое ново визуелно издание. И по 16 години, „Бижутерија“ не ја губи својата моќ. Таа останува песна што публиката сè уште ја пее, цитира и доживува како своја, а со текот на времето прерасна во многу повеќе од хит – стана дел од колективната емоција и секојдневниот живот.
Во новиот видео запис, песната добива свеж визуелен идентитет и нова енергија, задржувајќи ја препознатливата емоција што ја правеше безвременска. Од самиот почеток, „Бижутерија“ не беше само песна, туку и став, порака и симбол. А ја создаде и иконската фраза „жена, мајка, кралица“, која стана препознатлив израз на силата и идентитетот на жените.
Проектот е воедно и знак на благодарност до публиката што е со Јелена три децении – од најраните денови до новите генерации кои штотуку ја откриле нејзината музика.
„Некои песни едноставно продолжуваат да живеат свој живот. Оваа е една од нив. По сите овие години, таа доби ново лице и нова енергија, и ми е мило што ѝ дозволив повторно да ја раскаже својата приказна“, рече Јелена Розга.