Оперската пејачка Марта Хаџиманов се прости од својата баба Сенка

Внуката на Зафир Хаџиманов и Сенка Велетанлиќ која гради меѓународна оперска кариера во Германија, на социјалните мрежи се збогуваше со својата баба која почина вчера. Младата оперска уметница Марта Хаџиманов во неколку реченици изрази тага, благодарност и безусловна љубов кон жената која, како што истакна, засекогаш остана нејзин пример.

„Мојата прекрасна, прекрасна баба нè напушти денес. Бабо моја, многу те сакам. Секогаш ќе го слушам и ќе го паметам твојот трогателен, топол и сладок глас. Никој на светот не е таква модна икона и дама како што беше ти. Ти благодарам што беше мој пример и инспирација и што ми дозволи да ти ја крадам облеката и да ти ги пробувам чевлите кога бев мала. Ми недостигаш, одмори ја твојата добра душа и пеј.“

Марта Хаџиманов, сопранистка, е родена во Белград во 2000 година, а моментално живее и работи во Германија. Со својот талент и посветеност, таа многу рано го привлече вниманието на музичката јавност, и во Србија и во странство. Во 2024 година, таа започна двојни магистерски студии на одделите за опера и концерт/лид на Државниот универзитет за музика и сценски уметности во Манхајм, во класата на проф. Каролина Мелцер. Претходно, таа заврши двојна додипломска програма во истата институција и тоа насока опера и музичка педагогија.