Драмски и Кумановски театар ги добија наградите на Фестивалот на античка драма „Стоби“

Народниот театар „Јордан Хаџи Константинов – Џинот“ од Велес ги објави добитници на наградите на Интернационалниот фестивал на античка драма – ИФАД „Стоби“ 2025.

Жирито во состав: Јордан Витанов, Кристина Атанасова Арсова и Фаик Мефаилоски, со едногласна одлука ги додели овогодинешните награди на најистакнатите остварувања на фестивалот.

Награда за најдобра претстава: „ИФИГЕНИЈА ЗА НИШТО“ – во продукција на Драмски театар Скопје

Претставата се издвојува со силна концептуална визија, која античката трагедија ја претвора во современ политички и егзистенцијален коментар. Преку минималистички, но прецизно изграден сценски јазик, „Ифигенија за ништо“ создава длабоко емотивно и интелектуално искуство кое ја поврзува митологијата со реалноста на денешниот човек.

Награда за режија: ФИЛИП ПЕТКОВСКИ – за претставата „ИФИГЕНИЈА ЗА НИШТО“

Петковски создава моќен визуелен и звучен универзум во кој трагедијата се движи меѓу древното и модерното. Неговата режија е суптилна, но впечатлива – вешто балансира меѓу симболиката и човечката драма, овозможувајќи на актерите и публиката да доживеат вистинска катарза.

Награда за најдобра женска улога: ЈЕЛЕНА ЖУГИЌ – за улогата на Клитемнестра во претставата „ИФИГЕНИЈА ЗА НИШТО“

Со моќна енергија и прецизна емоционална контрола, Жугиќ создава потресна Клитемнестра – мајка и жена која се бори меѓу љубовта, болката и одмаздата. Нејзината изведба е пример за актерска посветеност и сценска присутност што го држи вниманието до последниот миг.

Награда за најдобра машка улога: МАРКО ТРАЈКОВИЌ – за насловната улога во претставата „КАЛИГУЛА“ на Кумановски театар

Трајковиќ ја толкува сложената фигура на Калигула со извонредна психолошка длабочина и интензитет. Неговиот настап ја открива тенката линија меѓу лудилото и апсолутната моќ, претворајќи ја класичната драма во живо, современо размислување за човековата природа и општествените механизми на контрола.

„Честитки до сите наградени за нивната уметничка храброст, посветеност и инспирација! Фестивалот „ Стоби“ уште еднаш покажа дека античката драма е бескрајно актуелна и дека новите генерации театарски творци знаат како да ѝ дадат свеж, силен и човечки глас“ – велат од Велешки театар.

Во чест на наградените ќе биде изведена претставата „Лекција“ од Ежен Јонеско, а во режија на Ѓорѓи Ризески. Улогите ги толкуваат: Ефтим Трајчов Ѓаурски, Димитрина Мицкоска Трајкоска и Милорад Ангелов. Сценографија е на Трајчов Ѓаурски и на режисерот Ризески, костимите се колективно дело, а музиката е на Антонио Ристески. Кореографијата е на Бојан Мицев, за плакатот се погрижи Александар Вржалски, а фотограф е Александар Ефремов.