Театарот при Домот на културата „Иван Мазов – Климе“ – Кавадарци започна со читачки проби за две претстави од неколкуте премиерни годинава.
Првата е комедијата „Жена ми се вика Борис“ која се работи според оригиналниот текст “Жена ми се вика Морис“ на авторот Рафи Шарт. Во кавадаречкиот театар се поставува за прв пат и тоа во режија на Диме Боцев. Играат: Видан Станоев, Диме Боцев, Благица Боцева, Александар Малинков, Сашко Орешков, Цветанка Прочков и Анастасија Данаилова. Проверена актерска екипа со мали изненадувања за многу радост и аплаузи на љубителите на театарската уметност.
Втората претстава во подготовка носи наслов “Шекспир во приказни“, според текстови на Вилијам Шекспир. Во неа се опфатени монолози и дијалози од најголемите трагедии “Ромео и Јулија” ” Хамлет” и “Макбет”, а се во адаптација и режија на Микица Илова. Овој драмски перформанс низ поезија е приказна за љубовта и каењето, алчноста, болната амбиција за власт, предавството, борбата на човекот против неправдата, лицемерието и предавството меѓу најблиските. На многу живописен начин се отсликува вистинското лудило од неизмерна тага, болен гнев и морално пропаѓање. Во претставата учествуваат и средношколци од Гимназијата”Добри Даскалов”.
Играат: Александар Стојков, Саше Орешков, Арелена Гостимировиќ, Ристе Стојанов, Јована Секуловска, Ивана Секуловска, Елена Илова, Јован Илов, Мартина Илиевска, Цветанка Ристовска и Марија В’чкова.
Премиерата се очекува во почетокот на месец март 2025.