Џамбазов и Гуру Харе со „Забрањено пушење“ на S.O.S. фестивалот

Вчеравечер во организација на Fresh Union на Ракометното игралиште во Битола се одржа S.O.S. Festival 2024. Оваа година фестивалот го започна ROOTBOY SELECTOR кој ја размрда битолската публика и ја подготви за настапот на легендарниот Игор Џамбазов и Гуру Харе Бенд.

„Овој пат S.O.S. не значи дека сме во опасност туку значи: „Спас од сељаци!““, додаде Игор

Двата Игоровци ги отсвирија најпознатите, стари и нови хитови и преработки од нивниот албум „The best off Игор Џамбазов & Гуру Харе Бенд“. Публиката уживаше во хармонијата на блуз музиката и македонските текстови. Голем впечаток остави изведбата на преработката на „Ако умрам ил загинам“ од Јонче Христовски за кој Џамбазов изјави дека беше еден голем и фин господин човек-белег на македонската народна песна.

Најголемите ѕвезди на вечерта беа култните „Забрањено пушење“, еден од најпознатите екс-југословенски рок бендови од Сараево, кои скоро три часа ги забавуваа обожувачите со нивните „Зеница блуз“, „Гузоњин син“, „Пишоња и Жуга“, „Фикрета“ и многу други.

Фото: Ивона Кочов