Започнува проектот „Полска на полица“

Полскиот амбасадор во нашата земја, Н.Е Кшиштоф Гжелчик ја посети Градската библиотека „Браќа Миладиновци“ – Скопје и донираше збирка од педесетина наслови од полски автори преведени на македонски јазик. Донацијата, што во име на библиотеката ја прими директорката Снежана Стојчевска, е симболичен почеток на проектот „Полска на полица. Полската книжевност во македонските библиотеки“.

Задоволни сме што Амбасадата на Полска ја препозна токму нашата библиотека како партнер во овој проект, бидејќи делиме заеднички заложби за промоција на вистинските естетски вредности. Исто така, го делиме и верувањето дека библиотеката во денешно време треба да биде многу повеќе од простор за зајмување книги. Силно веруваме дека библиотеката треба да биде активно и отворено културно јадро – истакна директорката на библиотеката, Снежана Стојчевска.

Проектот за популаризација на полските книжевни достигнувања меѓу македонската читателска публика започнува токму од Градската библиотека „Браќа Миладиновци“ – Скопје каде што на 27 февруари ќе се одржи и семинар за македонските библиотекари. Предавањата ќе бидат  посветени на полската книжевност, особено на насловите од донираната збирка, во која има класици, современи автори, како и книги за деца и млади. На семинарот ќе говорат професорите и преведувачи од Филолошкиот факултет „Блаже Конески“- Скопје: проф. д-р Лидија Танушевска, проф. д-р Јасминка Делова-Силјанова и проф. д-р Весна Мојсова-Чепишевска, како и претставник од полскиот Институт за книга.

Во мај, како дел од активностите, ќе се одржи и Месецот на полската книжевност со гостувања на неколку современи полски писатели и нивно претставување пред скопската и македонската публика.

Иницијатори и координатори на проектот „Полска на полица“ во Македонија се Јоланта Гжелчик и д-р Билјана Кочишка советник-библиотекар за меѓународна соработка во Градската библиотека. Автор на дизјанот е Наталија Лукомска. Проектот е поддржан од македонското Министерство за култура и полскиот Институт за книга.